En todas as mans

15 Setembro, 2015

O vindeiro venres temos un vov sobre os montes veciñais en man común.

Hora: 20:30

VOV 18/09: Proxección do documental En Todas As Mans, sobre os montes veciñais en man común. Charla/coloquio e petiscos.

Da web do proxecto, http://www.entodasasmans.com/

Teremos como convidados  ao presidente da Comunidade de montes de Paraños e a Tito Fernández Prieto (se alguén aínda non o coñece, é catedrático de Historia Contemporánea da USC e coordenador de HISTAGRA, grupo de investigación de Historia agraria e política do mundo rural).

 

“No país do minifundismo permanece unha realidade que é de todas, e ao tempo de ninguén. Así é o mundo dos montes veciñais en mancomún.

Esta forma de titularidade comunitaria asenta as súas raíces nunha concepción colectiva do territorio, e fai parte do patrimonio cultural galego.

Hai trinta anos os seus lexítimos titulares, a veciñanza dos lugares, comezaron a recuperar a xestión dos montes veciñais, é tempo pois de realizar unha achega á situación actual deste réxime de titularidade.

Pretendemos construír un relato tecido coas voces das xentes das comunidades e do ámbito académico. Construíremos, así, unha ollada diversa, unha reflexión colectiva sobre o monte veciñal e o seu futuro.

Os montes veciñais en mancomún

Os montes veciñais en mancomún son formas de titularidade de orixe xurídica xermánica. Fronte a propiedade pública ou privada, que teñen orixe xurídica romana, este xeito de xestionar o territorio non supón ser propietario, senón usufructuario, dereito de uso e xestión. O monte veciñal non se pode vender, nen parcelar.

Na actualidade, a forma do veciñal existe no territorio galego e no norte de Portugal. Galiza conta con aproximadamente 3000 comunidades de montes en mancomún, que xestionan perto de 700.000 ha de territorio galego, o que representa case 0 25 % da superficie do país.

A titularidade comunitaria implica na xestión do territorio unha parte considerábel da poboación, na volta de 150.000 comuneiros/as.

Que fai necesario este traballo?

Este documental pretende mostrar o mundo do monte veciñal, unha realidade próxima, escasamente coñecida e pouco valorada pola sociedade galega. Ao tempo, queremos sinalar as potencialidades que ten como ferramenta válida para a xestión e custodia do territorio próximo.

Pretendemos sinalar a titularidade comunitaria como un elemento que fai parte do patrimonio cultural galego.

Queremos que este proxecto sirva como recoñecemento para as persoas que conforman as comunidades de montes, os comuneiros e comuneiras. Desexamos estimular a súa participación e o orgullo por poder participar dun xeito de xestión do territorio propia, ao tempo que esa apreciación se expande ao conxunto da cidadanía galega.”